Rifjað upp þegar bandarísk herflugvél fórst í Akrafjalli

Miðvikudaginn 23. nóvember 1955 gat að líta dapurlega frétt í dagblöðum á Íslandi. Mörgum var brugðið, ekki síst íbúum Akranesbæjar og fólki í sveitunum umhverfis Akrafjall. Tveimur dögum fyrr hafði bandarísk herflugvél frá Keflavíkurflugvelli rekist á klettabeltin í norðurhlíðum fjallsins, tæst í sundur og fjórir menn farist. Enginn virtist hafa orðið var við slysið. Flakið fannst ekki fyrr en rúmum sólarhring eftir að vélin fórst. Þá hafði þegar verið lýst eftir henni og umfangsmikil leit hafin bæði á sjó og úr lofti. Á þessu ári eru 58 ár liðin síðan þetta slys varð. Enn má finna tætlur af braki úr vélinni í hlíðum Akrafjalls rétt vestur af svokölluðum Pyttum beint ofan við bæinn Ós.

Nokkrir heimamenn á Akranesi hafa unnið að því að setja upp minnisvarða um þetta slys við rætur fjallsins neðan við þann stað þar sem flugvélin fórst.

Í ítarlegri frásögn í Skessuhorni í dag skrifar Magnús Þór Hafsteinsson um slysið og ekki síst aðdraganda þess og byggir frásögn sína á skýrslu bandaríska flughersins um atburðinn. Frásögn þessi hefur ekki birst í fjölmiðlum áður.

Fyrsti sigur Skagamanna

Skagamenn náðu í sín fyrstu stig í Pepsídeildinni í kvöld þegar þeir unnu 2:0 sigur á Fram á Akranesvelli. Gestirnir voru engu að síður betra liðið í fyrri hálfleiknum og voru snemma leiks nálægt því að skora, en Páll Gísli varði vel í marki Skagamanna, til að mynda aukaspyrnu sem Framarar fengu alveg við teiginn. Þvert gegn gangi leiksins skoruðu Skagamenn á síðustu andartökum hálfleiksins. Joakim Wrele skoraði af stuttu færi eftir góða sendingu frá Theodore Furness. Heimamenn byrjuðu síðan seinni hálfleikinn af krafti. Á 47. mínútu áttu þeir góða sókn upp hægri kantinn og Hallur Flosason skoraði af markteig. Skagamenn vörðust síðan vel og áttu inn á milli góðar sóknir þannig að þeir voru allt eins líklegir til að bæta við mörkum en gestirnar að minnka muninn. Fleiri urðu mörkin ekki og ÍA er nú komið með 3 stig og færðist þar með úr 11 sætinu í það 9. til 10.

Griðasvæði hvala í Faxaflóa stækkað til að auka svigrúm hvalaskoðunarskipa

Ný reglugerð um bann við hvalveiðum tekur gildi á miðnætti. Í tilkynningu frá atvinnuvega- og nýsköpunarráðuneytinu segir að í ljósi þess að hvalveiðitímabil sé nú að hefjast hafi ráðherra óskað eftir tillögum nefndar, sem nú er að störfum í tengslum við stefnumörkun í hvalveiðimálum, um það hvernig griðasvæði hvala skyldi afmarkað í Faxaflóa. Meirihluti nefndarinnar telji ljóst að umfang hvalaskoðunar og þjóðhagslegt mikilvægi hennar hafi aukist á undanförnum árum og mikilvægt sé að umgjörð hvalaskoðunar og hvalveiða sé með þeim hætti að ásættanlegt teljist fyrir báðar atvinnugreinar.  „Tillaga meirihluta nefndarinnar er sú að griðasvæði hvala verði stækkað í Faxaflóa og verði frá Garðskagavita og beina línu að Arnarstapa.

Stolið úr bílum - lögregla minnir bíleigendur á að taka lykla og læsa bílum

Farið var inn í tvær ólæstar bifreiðar við Vesturgötu á Akranesi í vikunni og úr þeim stolið sjónauka og GPS staðsetningartæki. Lögreglan segir rétt í þessu tilefni að brýna fyrir fólkið að skilja aldrei bifreiðar eftir ólæstar hvort sem það er um styttri eða lengri tíma og þá skipti engu hvort bifreiðar standa í innkeyrslum við hús eða á almennum bifreiðastæðum. Af sama tilefni sé rétt að minna á að fyrir rúmri viku var tveimur bifreiðum stolið fyrir utan sama húsnæði á Akranesi og voru lyklarnir í bílunum í báðum tilfellum. Önnur bifreiðin var eyðilögð og báðar skildar eftir á víðavangi. Í tilkynningu frá lögreglu segir að þegar bíll er skilinn eftir ólæstur og hlutum stolið úr honum eigi fólk ekki rétt til bóta fyrir það sem stolið er og þegar lyklar eru skildir eftir í bifreiðum falli bótaréttur niður. Bifreiðaeigendur eigi að tryggja eignaöryggi sitt eins og kostur er og að skilja bifreiðar eftir ólæstar og með lyklum í flokkist undir vanrækslu.  

Stórsigur í fyrsta leik hjá Skagakonum

Skagakonur í fótboltanum hófu Íslandsmótið í 1. deild með glæsibrag. Þær fengu lið BÍ/Bolungarvíkur í heimsókn í í Akraneshöllina sl. laugardag og unnu stórsigur, 9:0. Fyrsta markið kom strax á 5. mínútu leiksins og staðan í hálfleik var 5:0. Emilía Halldórsdóttir skoraði fjögur mörk í leiknum og þær Guðrún Karítas Sigurðardóttir, Alexandra Björk Guðmundsdóttir, Eyrún Eiðsdóttir og Unnur Ýr Haraldsdóttir eitt mark hver. Síðasta markið í leiknum var sjálfsmark gestanna.

Næsti leikur hjá Skagakonum verður gegn Tindastóli á Akranesi nk. föstudag. Hitt Vesturlandsliðið í A-riðli 1. deildar, Víkingur, byrjar keppni í kvöld, miðvikudagskvöld, þegar Víkingskonur sækja ÍR-inga heim í Breiðholtið.