Alli segist hafa komist að því að upphaf ruðningsiðkunar hafi verið á svipuðum tíma annars staðar í Evrópu. Áhuginn hér á landi lognaðist út af þegar Stöð 2 hætti að sýna leikina. “Stöð 2 hóf göngu sína hér ´87 og byrjaði að sýna frá leikjunum. Þegar þeir hættu því dó ruðningsíþróttin hér en hélt áfram að vaxa í Evrópu.”
Stormþursarnir byrjuðu að æfa um mitt sumar en færðu sig inn í Akraneshöllina í haust. “Það er svo stutt síðan að við fengum búningana að við erum enn að venjast þeim. Á æfingum spilum við mest æfingaleiki, skiptum í tvö lið og spilum. Seinna förum við út í æfingar til að þjálfa sérstakar stöður og þess háttar,” segir Alli. Enn sem komið er munu Stormþursarnir vera eina starfandi ruðningsliðið á landinu. “Það er reyndar kominn vísir að liði í bænum en þeir eru ekki búnir að kaupa búninga eða þess háttar.”
En hvaðan kemur nafn liðsins? “Við vorum búnir að pæla í ýmsum nöfnum og skrifuðum mörg fyndin á blað, Naglbítarnir og fleira. Þetta átti að vera svona harkalegt og karlmennskulegt,” segir Alli og hlær. “Einhverjir svakalegir Stormþursar.” Hann segir að áhugasamir megi gjarnan bætast í hópinn. “Það væri bara gaman og jákvætt ef fleiri hafa áhuga á að vera með.”
Alli segir misjafnt hversu vel liðsmennirnir séu að sér um íþróttina. “Sumir höfðu ekki einu sinni séð leik en langaði að prófa að spila.” En geta þeir eitthvað? “Ja, við erum allavega bestir á Íslandi,” segir Alli og brosir.
| 
