Skessuhorn:

Brjálað að gera í ísbúðinni Íslandi

24. mars 2010

Snæfellingurinn Hlédís Sveinsdóttir réðst í það í byrjun ársins að opna ísbúð í Reykjavík. Ísbúðin heitir því hófsama nafni Ísland og er á besta stað í bænum, við Suðurver hjá Kringlumýrarbraut, skammt frá Kringlunni. Ísbúðin Ísland var opnuð 28. janúar síðastliðinn og hefur fengið góðar viðtökur. Hún er nú opin frá hálf tólf á morgnana til sama tíma á kvöldin og mikið að gera. „Ég var að vinna hérna mestallan febrúarmánuð og er komin með þó nokkurt staff í kringum þetta,“ segir Hlédís. Hún sagði í samtali við Skessuhorn að sig hafi lengi langað til að opna hlýlega ísbúð í stað allra þessara stöðluðu köldu ísbúða. „Mitt markmið var að hafa búðina hlýlega, kósý og fallega með sterkri skírskotun til sveitarinnar og uppruna afurðanna. Það er nefnilega þannig að ísinn er ekki frá verksmiðunni og kjötið ekki frá SS. Ísinn kemur frá kúnni og kjötið er af kindinni.

Við framleiðendur og bændafólk megum aldrei gleyma þessu og eigum að ota því fram. Ég held það hafi bara tekist bærilega að skapa þetta umhverfi hérna. Í búðinni er ég með einn vegginn alveg undir mynd af kú rétt eins og þetta sé á túninu og framan á búðinni er sterk mynd úr sveitinni.“

Nánar er rætt við Hlédísi í Skessuhorni vikunnar sem kom út í dag.