 Ekki mátti miklu muna að illa færi sl. föstudag þegar stórt járnstykki féll af flutningabíl á norðurleið við Borgarfjarðarbrú og lenti framan á fólksbíl sem kom úr gagnstæðri átt. Fólksbíllinn snerist á veginum og lenti út í grjótgarðinum. Þrennt var í fólksbílnum og hlaut fólkið minniháttar meiðsli og var flutt á heilsugæslustöðina í Borgarnesi til skoðunar. Bifreiðin varð óökuhæf eftir óhappið og mildi að ekki fór verr. Festingar á farmi flutningabílsins, sem var að koma úr Reykjavík, höfðu gefið sig og járnstykkið fallið af pallinum án þess að bílstjórinn hefði orðið þess var. Vitni höfðu samband við lögregluna sem hafði uppi á ökumanni bílsins. Má hann búast við að verða kærður fyrir vanrækslu við frágang á farmi vörubifreiðarinnar.
|
