Skessuhorn:

Verkefnisstjórn nýs háskólasjúkrahúss boðar fund á Akranesi

16. apríl 2010

Verkefnisstjórn um um byggingu nýs háskólasjúkrahúss í Reykjavík boðar til fræðslufundar í fundarstofu Heilbrigðisstofnunar Vesturlands á Akranesi fimmtudaginn 29. apríl nk. klukkan 16:30. Þangað er starfsfólk HVE hvatt til að mæta sem og annað áhugafólk. Í fundarboði frá verkefnisstjórn segir m.a: “Við sem höfum unnið að undirbúningi nýbyggingar Landspítala höfum orðið vör við talsverða tortryggni í garð þessa verkefnis í blöðum, á bloggsíðum og í almennum umræðum. Eins og oft verður í slíkum umræðum verða menn fullyrðingaglaðir og mikils misskilnings eða jafnvel rangfærslna gætir. Verra er þó að margir sem starfa við heilbrigðismál utan Landspítala upplifa verkefnið sem einhvers konar ógnun við eigin stofnun eða starfsemi.

Við finnum því fyrir þörf fyrir upplýsta umræðu og höfum í hyggju að leggja land undir fót og bjóða upp á fundi með starfsmönnum heilbrigðisþjónustunnar sem víðast um landið, núverandi og verðandi sveitarstjórnarfólki og almenningi sem áhuga hefur á málefninu.”

Þeir sem verða með í för af hálfu verkefnisstjórnar eru Gunnar Svavarsson formaður, Gyða Baldursdóttir hjúkrunarfræðingur og stjórnarmaður í verkefnisstjórn og Jóhannes Gunnarsson fv. framkvæmdastjóri lækninga og nú læknisfræðilegur verkefnisstjóri nýs háskólasjúkrahúss.