Skessuhorn:

Vilja opinberar stofnanir til Akraness

14. apríl 2010

Bæjarstjórn Akraness samþykkti einróma á fundi sínum í gær ályktun til ríkisstjórnarinnar  í tilefni yfirlýsingar Jóhönnu Sigurðardóttur forsætisráðherra um nauðsyn þess að fækka ríkisstofnunum verulega, allt að 40%, en þær eru taldar um 200 í dag. Bæjarstjórn Akraness vill leggja ríkisstjórninni lið í þessu efni og samþykkti einróma eftirfarandi ályktun:  „Í tilefni ummæla forsætisráðherra Íslands óskar bæjarstjórn Akraness eftir viðræðum við forsætisráðherra um flutning opinberra stofnana til bæjarfélagsins og aðkomu kaupstaðarins að því verkefni. Bæjarstjórn Akraness lýsir sig einnig reiðubúna til að vinna að frekari uppbyggingu á þeim ríkisfyrirtækjum sem hér eru, sérstaklega Heilbrigðisstofnunar Vesturlands á Akranesi.”

Í bókun frá fundinum segir einnig að bæjarstjórn Akraness óski eftir  því við þingmenn Norðvesturkjördæmis að þeir vinni ötullega með bæjarstjórninni að þessu máli. Bæjarstjóra var falið að koma ályktunni á framfæri við ríkisstjórn Íslands og þingmenn kjördæmisins. „Við teljum að góð reynsla sé af flutningi ríkisstofnana til Akraness og er nærtækt að nefna Landmælingar Íslands. Hér er húsakostur góður og öll aðstaða til að taka við opinberum stofnunum,“ segir Gísli S. Einarsson bæjarstjóri.