Skessuhorn:

Skora á ríkisstjórnina að nýta þær sjúkrastofnanir sem til eru

23. apríl 2010

Á fundi fulltrúaráðs sjálfstæðisfélaganna á Akranesi 20. apríl sl. var samþykkt ályktun um nýtingu þeirra sjúkrastofnana sem til eru í landinu. Ályktunin er svohljóðandi:

“Fulltrúaráð Sjálfstæðisflokksins á Akranesi skorar á ríkisstjórn Íslands að endurskoða þá áætlun að byggja hið nýja háskólasjúkrahús í Reykjavík án þess að hafa áður fullkannað alla aðra möguleika til eflingar heilbrigðisþjónustu.  Sérstaklega með það að leiðarljósi að auka nýtingu á sjúkrastofnunum sem fyrir eru. Það þarf að taka alla þætti inn í þá útreikninga áður en hægt er að leggja mat á hvort hagkvæmt er að byggja sjúkrahús við Hringbraut þar sem er t.d fyrirséð er að þurfi miljarða króna í gatnaframkvæmdir.

Fulltrúaráðið telur fullkomlega óeðlilegt að fjármunir lífeyrisjóðanna verði notað í verkefni sem fyrirsjáanlega komi til með að hafa áhrif á atvinnuöryggi starfsfólks sjúkrahúsa í nágrannasveitafélögum höfuðborgarsvæðisins, þar með talda Heilbrigðisstofnun Vesturlands. Fulltrúaráðið skorar á ríkistjórnina að leggja áherslu á að nýta þær sjúkrastofnanir sem eru fyrir hendi í nágrannasveitafélögunum höfuðborgarinnar, íbúum Íslands og þessara sveitafélaga til heilla.”