 Í gróðrarstöðinni Sólbyrgi í Borgarfirði er ýmis tilraunastarfsemi í gangi. Garðyrkjubændur gerðu nýlega samning við fyrirtækið ORF Líftækni um ræktun erfðabreytts byggs í 2.700 fermetra gróðurhúsi. Þá stendur fyrir dyrum tilraun með beina sölu alls grænmetis frá stöðinni, eða sölu beint frá býli, eins og reyndar tíðkast á Suðurlandi og víðar. Þar verður meðal annars hægt að kaupa agúrkur, tómata, salat, gulrætur og kúrbít í milliliðalausri sölu. Ein athyglisverð nýjungin sem bændur í Sólbyrgi eru nú að prófa sig áfram með er svokölluð föturæktun á agúrkum. Það er gert til að nýta gróðurhúsin betur. Í botni húsanna vaxa gulrætur í tugþúsundavís en fyrir ofan þær eru fötur sem innihalda agúrkuplöntur. Þessi tilraun er nýjung hér á landi og verður spennandi að vita hvernig til tekst.
Sjá viðtal við garðyrkjubændurnar Einar og Nönnu í Sólbyrgi í Skessuhorni sem kom út í dag.
|
