Skessuhorn:

Aukin lýsing enda á milli í göngunum

4. maí 2010

Í lok síðustu viku var lokið við tvöfaldun raflýsingar í Hvalfjarðargöngum til þæginda og öryggis fyrir vegfarendur. Nú lýsa alls 753 lampar í göngunum og bregða birtu yfir akbrautirnar enda á milli. Verkefnið hefur verið umfangsmikið og var framkvæmt í þremur áföngum á jafnmörgum árum. Síðasta áfanga verksins lauk í síðustu viku þegar göngin voru lokuð í fjórar nætur frá miðnætti til klukkan sex að morgni.

Þessi næturlokun er annars árlegur viðburður í rekstri ganganna, tími viðhalds og hreingerninga. Þá dytta menn að tækjabúnaði, ryksuga, þvo og hressa upp á málningu umferðarmerkinga á ökuleiðum. Í tilkynningu á heimsíðu Spalar segir að „öskudagarnir,“ sem Eyjafjallafjallajökull kallaði óvænt yfir heimsbyggðina, hefðu getað sett strik í reikninginn hjá Spalarmönnum varðandi áformaða hreingerningar- og viðhaldsviku.

Ef til dæmis Keflavíkur- og Reyjavíkurflugvöllur hefðu lokast í lengri tíma og Akureyrarflugvöllur þá þjónað millilandaflugi á meðan, hefði ekki gengið að loka Hvalfjarðargöngum um nætur. En þetta slapp, segja Spalarmenn.