Skessuhorn:

Svarti listinn boðar til borgarafundar í Borgarnesi

4. maí 2010

“Svarti listinn boðar íbúa Borgarbyggðar til borgarafundar á B57 í Borgarnesi fimmtudaginn 6. maí næstkomandi kl. 20:00. Þar gefst íbúum kostur á að móta stefnu framboðslistans fyrir komandi sveitarstjórnarkosningar. Svarti listinn er nýr framboðslisti í Borgarbyggð sem hyggur á umbætur á stjórnsýslu sveitarfélagsins,” segir í fréttatilkynningu. Þar segir að Svarti listinn sé þver- eða ópólítískt framtak og muni stefna listans verða mótuð í kjölfar fundarins. “Stefnan kemur því til með að byggja á hugmyndum íbúa sveitarfélagsins og miðast því ekki við hápólítískar flokkslínur gróinna stjórnmálaflokka. Nú er kominn tími á breytingar.

Óvíða á Íslandi er staðan verri en í Borgarbyggð og neita meðlimir Svarta listans að horfa upp á sömu aðila komast að kjötkötlunum enn eina ferðina eins og ekkert hafi í skorist. Ástandið er slæmt og efnahagshruni verður ekki eingöngu kennt um. Óskynsamlegar ákvarðanir fráfarandi sveitarstjórnar, þeirra sömu aðila og sækjast nú eftir endurnýjuðu umboði kjósenda, vega hvað þyngst þegar ástæður hruns Borgarbyggðar eru raktar. Nú er kominn tími til að segja stopp. Sameinumst á B57 á fimmtudagskvöld og mótum framtíð okkar ástkæra sveitarfélags,” segir að lokum í tilkynningu.

Verði af framboði Svarta listans verður það fimmti listinn sem býður fram í sveitarfélaginu fyrir kosningar 29. maí. Þegar hafa verið birtir listar Framsóknarflokks, Sjálfstæðisflokks, Samfylkingar og VG.