Skessuhorn:

Sjómannadagsblað Snæfellsbæjar komið út

3. júní 2010

Sjómannadagsblað Snæfellsbæjar kemur út nú fyrir Sjómannadaginn. Í blaðinu er m.a. að finna margar og áhugaverðar greinar. Sjávarútvegs- og landbúnaðarráðherra Jón Bjarnason skrifar grein í blaðið. Þá er stórfróðleg grein er eftir Ásgeir Jóhannesson um Kaupfélagið Dagsbrún í Ólafsvík og þá um leið kaupfélagsstjóratíð Alexanders Stefánssonar seinna sveitarstjóra, alþingismanns og ráðherra. Undir stjórn Alexanders var Kaupfélagið Dagsbrún mjög öflugt félag og stóð fyrir mörgum verkefnum til heilla fyrir Ólafsvík og enn er fyrirtæki starfandi í Ólafsvík sem stofnað var á þessum árum.  Um tíma voru 135 manns sem störfuðu á vegum þess. Alexander var svo seinna sveitarstjóri í Ólafsvík og setti sterkan svip á bæinn með sínum störfum. Þá var hann einnig þingmaður og ráðherra.

Ester Úranía Friðþjófsdóttir frá Rifi segir í skemmtilegri grein frá uppvexti og störfum sínum. Hún var frumbyggi í Rifi en foreldrar hennar byggðu þar fyrsta húsið. Í tilefni 100 ára ártíðar Víglundar Jónssonar útgerðarmanns í Ólafsvík á þessu ári er grein um líf hans og starf en hann á stóran þátt í uppbyggingu Ólafsvíkur með sínum útgerðar- og fyrirtækjarekstri. Páll Ingólfsson framkvæmdastjóri Fiskmarkaðs Íslands rekur í fróðlegri grein starfsemi þessa öfluga fyrirtækisins frá upphafi og til dagsins í dag. Jónatan Sveinsson lögfræðingur og fyrrum skipstjóri ritar grein um leiki og afþreyingu ungmenna í Ólafsvík á sínum uppvaxtarárum þar. Spjall er við Sigurð Kristjónsson skipstjóra á Hellissandi um aðferðir við ákvörðun aflamarks hjá Hafró, sem hann gefur ekki háa einkunn. Í blaðinu er einnig margar greinar um menn og málefni og myndir frá Sjómannadögum frá bæjarfélögunum á Snæfellsnesi. Blaðið er 76 síður og prentað og brotið um í Steinprent í Ólafsvík. Ritstjóri og ábyrgðarmaður er Pétur Steinar Jóhannsson.

(fréttatilkynning)