Skessuhorn:

Mikill erill hjá lögreglu

3. júní 2010

Lögreglumenn frá Akranesi og Borgarnesi hafa staðið í ströngu undanfarna daga en nánast allir lögreglumenn frá báðum embættunum hafa verið við störf.  Þrír eru í haldi lögreglu vegna gruns um innbrot í 31 sumarbústað, flesta í Skorradag. Þar var bæði skemmt og stolið. Einn hefur verið úrskurðaður í gæsluvarðhald og verið er að meta gæsluvarðhald yfir hinum tveimur. Yfirheyrslur eru enn í gangi. Samkvæmt upplýsingum frá lögreglunni á Akranesi tengjast þessi innbrot ekki þeim sem til rannsóknar eru í Borgarfirði og Árnessýslu eins og Morgunblaðið hélt fram í frétt í morgun. Um miðjan dag í gær var gerð húsleit í heimahúsi á Akranesi þar sem grunur lék á að kannabisræktun væri í gangi. Við leitina fundust sex kannabisplöntur sem voru vel á veg komnar og um 20 gr. af öðrum fíkniefnum. Tollverðir með leitarhunda aðstoðuðu lögregluna við leitina. Lögreglumenn frá báðum stöðum, Akra-Borg eins og þeir kalla sig, unnu að málinu. Það var klárað samdægurs en ekki hefði verið hægt að setja fleiri í fangaklefa því þeir eru fullir.

Í gærkvöldi var tilkynnt um að stórum blómapotti hefði verið kastað inn um glugga á íbúðarhúsi á Akranesi. Mikill hiti var í fólki og þurfti lögreglan að hafa hraðan á til að skakka leikinn. Tveir lögreglumenn fóru á vettvang en óskuðu fljótlega eftir frekari aðstoð. Tveir lögreglumenn komu á staðinn. Í asanum hlupu menn út úr bílunum til þess að veita skjóta aðstoð en þá stökk maður inn í annan lögreglubílinn og ók á brott. Honum var snarlega veitt eftirför og reyndist sá er sat undir stýri vera undir áhrifum áfengis og fíkniefna.