 IOGT á Íslandi hóf í síðustu viku átak gegn ölvunarakstri. Því var hleypt af stokkunum á veitingastaðnum Players í Kópavogi og er sá staður valinn, nú í miðri HM í knattspyrnu, til þess að vekja athygli á mikilvægi þess að aka edrú heim eftir góðar stundir yfir knattspurnuleik þar sem áfengi er jafnframt haft um hönd. IOGT á Íslandi gefur ökumönnum ókeypis gosdrykk á völdum veitingastöðum sem bjóða knattspyrnuáhugamönnum að horfa á HM. Þetta er táknræn aðgerð til þess að vekja athygli á þeirri sjálfsögðu skyldu ökumanna í hópnum að drekka ekki áfengi ef þeir eru á bíl á staðnum.
|
Á árunum 2005 - 2009 létust 23 einstaklingar í umferðarslysum sem rekja má til ölvunar við akstur og 352 slösuðust – þar af 62 mjög alvarlega. Á árunum 2005 – 2008 voru 7811 ökumenn kærðir vegna ölvunar við akstur. Þar af voru 40% eða 3124 yfir efri mörkum, þ.e. óhæfir til að aka bifreið skv. 45. gr. umferðarlaganna en þar stendur orðrétt: „Ef vínandamagn í blóði ökumanns nemur 1,2‰ eða meira eða vínandamagn í lofti, sem hann andar frá sér, nemur 0,60 milligrömmum í lítra lofts eða meira telst hann óhæfur til að stjórna ökutæki.”
Árið 1994 drukku Íslendingar 4,6 lítra af hreinum vínanda en árið 2010 er sú tala komin í 7,5 og nálgast Íslendingar óðfluga Grænlendinga, Dani og Finna sem trjóna á toppnum yfir Norðurlandaþjóðir hvað varðar áfengisneyslu.
|
