Skessuhorn:

Víkingar áfram í bikarnum en ÍA úr leik

24. júní 2010

Hér skora Þróttarar sigurmarkið í gær gegn ÍA.      Ljósm. Helgi Dan.

Víkingar voru öllu sterkara liðið í Ólafsvík í gær. Þeir komust yfir strax á 15. mínútu með marki Aleksandrs Cekulajevs og þannig var staðan í leikhléinu. Austanmenn jöfnuðu metin í byrjun seinni hálfleiks en Víkingar skoruðu síðan tvívegis um miðbik hálfleiksins, fyrst Tomasz Luba og síðan Aleksandrs Cekulajevs. Fjarðarbyggð náði síðan að skora eitt mark undir lok leiksins en það dugði ekki.

Akurnesingar voru daufir fyrstu 20 mínúturnar á Skaganum og Þróttarar skoruðu gott mark upp úr hornspyrnu á 12. mínútu. ÍA liðið lék betur fram að hálfleiknum en náði ekki að þjarma verulega að marki gestanna. Liðin skiptust síðan á að sækja í seinni hálfleiknum og undir lokin pressuðu Skagamenn mjög að marki Þróttara án árangurs.

ÍA og Þróttur mætast síðan aftur í deildarkeppninni á Skaganum á laugardag og vonandi tekst þá heimamönnum að sigra. Í kvöld fara fram þrír síðustu leikirnir í 16-liða úrslitum Visa-bikarsins og þá verður ljóst hvaða lið verða í pottinum þegar dregið verður í 8-liða úrslitin nk. miðvikudag.

þá

MT: Ragnar Leósson á fullri ferð að marki Þróttara í leiknum í gær.