Skessuhorn:

Unnið að rannsókn alvarlegs vinnuslyss

30. júní 2010

Starfsmanni Járnblendiverksmiðjunnar á Grundartanga, sem slasaðist alvarlega í vinnuslysi í gærkvöldi, er haldið sofandi á gjörgæsludeild Landspítalans í Reykjavík. Í tilkynningu sem forsvarsmenn Elkem Íslandi sendu frá sér um miðnættið í gærkvöld segir að sprenging hafi orðið í einum af þremur ofnum verksmiðjunnar um klukkan 19:30. Eldtunga og málmslettur brutust út úr ofninum og brenndist starfsmaðurinn sem þar var við vinnu sína mikið. “Ítarlegri viðbragðsáætlun Elkem er fylgt þegar aðstæður sem þessar skapast. Slökkt hefur verið á ofnum verksmiðjunnar og starfsemi hennar stöðvuð. Unnið er að rannsókn á tildrögum slyssins og verður upplýst nánar um málsatvik þegar frumathugun lýkur.”

Slökkvilið Akraness og Hvalfjarðarsveitar vann í gærkvöldi við að slökkva eld sem kviknaði og stóð eftir það brunavakt í verksmiðjunni. Sérfræðingar í áfallahjálp mætti í gærkvöldi á vinnustaðinn og sinnti því starfsfólki sem var að störfum þegar óhappið varð.

“Stjórnendur Elkem á Íslandi harma þetta alvarlega vinnuslys. Samræmdar öryggiskröfur Elkem eru miklar og þrautreyndar en í kjölfar slyssins verða allir verkferlar yfirfarnir og gaumgæfðir eins og frekast er unnt,” segir að lokum í tilkynningu frá fyrirtækinu.