Skessuhorn:

Þórður Guðnason er Vestlendingur ársins 2010

5. janúar 2011

Þórður Guðnason björgunarsveitar-maður á Akranesi er Vestlendingur ársins 2010. Hlýtur hann verðlaunin fyrir frækilegt björgunarafrek á Langjökli í lok janúar sem og fyrir sinn þátt í björgun annars mannslífs á Akranesi sl. sumar. Það voru fjölmargir lesendur Skessuhorns sem gáfu Þórði atkvæði sitt. Raunar fékk hann fleiri atkvæði en dæmi eru um í ellefu ára sögu þessara verðlaunaveitinga Skessuhorns. Líklega kemur þetta val fæstum á óvart í ljósi þess að þjóðin tók höndum saman í lok ársins og tilnefndi hann sem Mann ársins á einum þremur öðrum fjölmiðlum; á Rás 2, Bylgjunni og DV.

Alls fengu 37 einstaklingar tilnefningar í valinu á Vestlendingi ársins að þessu sinni. Eftirtaldir ellefu fengu þrjár tilnefningar eða fleiri:

Ásmundur Einar Daðason, alþingismaður.

Baldur Rafnsson, stjórnandi Lúðrasveitarinnar í Grundarfirði.

Bernd og Hildur í Brúðuheimum í Borgarnesi fyrir brautryðjendastarf sitt.

Davíð Óli Axelsson formaður björgunarsveitarinnar Lífsbjargar í Snæfellsbæ.

Einar Ólafsson kaupmaður á Akranesi.

Eva Karen Þórðardóttir dansskólastjóri í Borgafirði.

Hjörtur og Unnur á Hótel Hamri í Borgarnesi fyrir störf með atvinnulausum.

Ingibjörg Inga Guðmundsdóttir skólastjóri Grunnskóla Borgarfjarðar fyrir störf að sameiningu skóla.

Magnús Þorgrímsson forstöðumaður Svæðisskrifstofu um málefni fatlaðra.

Margrét Guðjónsdóttir frá Dalsmynni.

Sæþór Heiðar Þorbergsson í Stykkishólmi fyrir björgunarafrek á árinu og gott starf við rekstur veitingastaðar.

Sjá ítarlegt viðtal við Þórð Guðnason í Skessuhorni sem kom út í dag. Þar er einnig rætt við Sæþór H Þorbergsson sem, líkt og Þórður Guðnason, kom að björgun tveggja mannslífa á árinu sem leið.