 Snæfellingar biðu lægri hlut fyrir botnliði KFÍ þegar liðin mættust á Ísafirði á föstudagskvöldið. Þrátt fyrir tapið er Snæfell enn í efsta sæti IE-deildarinnar með 24 stig, jafnt Grindvíkingum sem einnig töpuðu óvænt í síðustu umferð fyrir Haukum. Bilið í næstu lið hefur styst við þessi töp toppliðanna. KR og Keflavík eru nú aðeins tveimur stigum fyrir neðan, hafa 22 stig hvort félag.
Snæfell saknar Ryan Amaroso sem hefur ekki verið með í síðustu leikjum vegna meiðsla. Þeir mættu mikilli útlendingahersveit fyrir vestan, en alls eru sjö útlendingar í KFÍ liðinu og sáu þeir einvörðungu um stigaskor heimamanna í leiknum. Heimamenn byrjuðu betur í leiknum og það var hlutverk Snæfellinga að elta allan leikinn. Munurinn á liðunum var lengst af ekki mikill. Í leikhléinu munaði aðeins tveimur stigum, 46:44. Það var síðan í lokahluta leiksins sem gestirnir voru gjörsamlega kafsigldir en þá komust Ísfirðingarnir í 20 stiga mun og lokatölur urðu 98:73.
|
Ingi Þór Steinþórsson þjálfari Snæfells sagði menn hafa verið full værukæra og ekki komið nægilega tilbúnir í leikinn. Liðið hafi alls ekki spilað nógu vel og því farið sem fór. Sem fyrr var Jón Ólafur Jónsson atkvæðamestur hjá Snæfelli, skoraði 23 stig og tók 11 fráköst, Emil Þór Jóhannsson setti 11 stig og tók 4 fráköst, Sean Burton 11 stig og 6 stoðsendingar, Atli Rafn Hreinsson 9 stig og 3 fráköst, Pálmi Freyr Sigurgeirsson 9 stig og 8 fráköst, Sveinn Arnar Davíðsson 6 stig og 3 fráköst, Egill Egilsson 4 stig og Daníel Kazmi 3.
Snæfell fær Tindastól í heimsókn í næstu umferð næstkomandi fimmtudagskvöld.
|
