Skagamenn unnu stórsigur á HK þegar liðin léku um þriðja sætið á æfingamótinu sem fotdolti.net stóð fyrir og lauk um helgina. Þetta var fjórði og síðasti leikur liðsins á mótinu. Skagmenn sigruðu FH og Stjörnuna auk HK en töpuðu naumlega leiknum gegn ÍBV. Leikurinn gegn HK fór fram í Akraneshöllinni sl. laugardag og endaði með 5:0 sigri ÍA. Skagamanna voru mun betra liðið allan tímann, staðan 4:0 í leikhléi og Þórður Þórðarson þjálfari gat leyft sér að skipta nánast um lið í seinni hálfleiknum.
Gary Martin skoraði þrjú mörk fyrir heimamenn og Arnar Már Guðjónsson eitt, Hjörtur J. Hjartarson bætti síðan við marki í seinni hlutanum. „Ég var mjög sáttur við leikinn. Strákarnir léku mjög vel og samheldnin var góð. Ég var ánægður með sóknarleikinn hjá Gary Martin og Stefáni og vörn og miðja stóðu sig vel. Þetta er allt á réttri leið hjá okkur," sagði Þórður Þórðarson eftir leikinn.
| 
