Skessuhorn:

Dögg Mósesdóttir tilnefnd til menningarverðlauna DV

23. febrúar 2011

Menningarverðlaun DV verða afhent í 32. skipti miðvikudaginn 2. mars í Gyllta salnum á Hótel Borg. Meðal þeirra sem tilnefnd eru að þessu sinni er Grundfirðingurinn Dögg Mósesdóttir fyrir hina ört vaxandi alþjóðlegu kvikmyndahátíð: Northern Wave Film Festival í Grundarfirði sem leggur áherslu á að sýna stutt- og tónlistarmyndir. Í umsögn með tilnefningunni segir að hátíðin leiði saman bæði íslenska og erlenda tónlistar- og kvikmyndagerðarmenn og gefur litlum bæ á köldum dögum dagsljós og líf. Þess má geta að hátíðin verður haldin í fjórða sinn dagana 4. til 6. mars næstkomandi.

Tilnefningarnar til menningarverðlauna DV eru 45 talsins að þessu sinni níu flokkum. Flokkarnir eru bókmenntir, byggingarlist, fræði, hönnun, kvikmyndir, leiklist, myndlist, tónlist og nú er í fyrsta skipti tilnefnt í flokki danslistar.