Skessuhorn:

„Brjótum múra“ ársverkefni um fjölmenningarsamfélag

25. febrúar 2011

Í dag, föstudag, hófst á Akranesi verkefni sem standa mun næsta árið og er um fjölmenningarsamfélög. Verkefnið hefur hlotið nafnið „Brjótum múra“ og er haldið í samstarfi Rauðakrossdeildarinnar á Akranesi, Akraneskaupstaðar, velferðarráðuneytisins og Evrópusambandsins, en styrkur hlaust til þess úr progressáætlun ESB. Námskeiðið er ætlað starfsmönnum Akraneskaupstaðar og þeirra sem um innflytjendamál fjalla í bænum.

Anna Lára Steindal starfsmaður Rauðakrossins á Akranesi kynnti verkefnið þeim sem mættir voru á fyrstu námskeiðin í sal Mömmueldhúss í dag. Anna Lára sagði að markmið verkefnisins væri að efla samvinnu og skapa ákveðin ramma um innflytjendamálin sem að gagni kæmu í fjölmenningarsamfélaginu. Búa til tæki sem nýttist í því að koma í framkvæmd þeim stefnum í innflytjendamálum sem ríki, sveitarfélög, ESB og fleiri hafa gert á síðustu árum, án þess að tæknilega lægi fyrir hvernig þeim yrði komið í framkvæmd.

Anna Lára sagði að stutt væri síðan að fjölmenningarsamfélag myndaðist á Íslandi, eins og til dæmis á Akranesi þar sem það er hlutfallslega stórt. Okkur væri gjarnt að tala um að innflytjendur þyrftu að læra inn á okkar samfélag, án þess að við þeir innfæddu legðu okkur fram um að læra á fjölmenningarsamfélagið. Með þetta í huga væri m.a. efnt til þessa verkefnis „brjótum múra.“

Það var Amal Tamini sem leiðbeindi á fyrsta námskeiðinu í verkefninu og síðan var komið að Guðrúnu Völu Elísdóttir frá Símenntunarmiðstöð Vesturlands, sem sér m.a. fyrir leiðbeinendum í verkefninu. Á þessu fyrsta námskeiði í dag voru m.a. mættir kennarar skólanna, en nokkurt brottfall var hjá þeim sem boðaðir voru, kennt þar um miklu annríki á föstudegi.