Skessuhorn:

Strætóferðir á Skagann breytast ekki

28. febrúar 2011

Breytingar voru gerðar á akstri Strætó frá og með gærdeginum, sunnudeginum 27. febrúar. Strætó mun frá þeim tíma ljúka akstri klukkutíma fyrr öll kvöld og hefja akstur tveimur klukkustundum síðar á laugardögum. Í þessu sambandi er rétt að geta þess að umræddar breytingar munu ekki hafa nein áhrif á akstur Strætó til og frá Akranesi. Akstur og tímatafla leiðar 57 úr Háholti í Mosfellsbæ og á Akranes helst óbreyttur.

Í frétt frá Akranesskaupstað er þess einnig getið að á næstu dögum verður sérstöku korti sem sýnir akstursleiðir og tímatöflur innanbæjarvagnsins um Akranes og tengingu hans við leið 57 hjá Strætó dreift inn á hvert heimili á Akranesi. Á bakhlið kortsins er svo að finna yfirlitsmynd sem sýnir helstu strætóleiðir á höfuðborgarsvæðinu. Kortin verða einnig aðgengileg hér á vef Akraneskaupstaðar og þá geta stofnanir og þjónustuaðilar fengið eintök af kortinu til notkunar og dreifingar.