Skessuhorn:

Naumt tap Snæfells/Skallagríms gegn Haukum

13. apríl 2011

Sameiginlegur unglingaflokkur karla Snæfells og Skallagríms í körfuknattleik mætti sterkum bikarmeisturum Hauka í undanúrslitum Íslandsmeistaramótsins um síðustu helgi. Lokatölur urðu 83 – 86 Haukum í vil sem töpuðu síðan fyrir Njarðvík í úrslitaleiknum.  Leikurinn var hnífjafn á köflum og voru Snæfell/Skallagrímur einu stigi yfir í hálfleik, 43-42. Baráttan var mikil og leikurinn hélt áfram að vera jafn. Staðan var 83-83 þegar lítið var eftir af leiknum. Haukar skoruðu næstu þrjú stig úr vítaskotum og reyndi Kristján Pétur Andrésson þriggja stiga skot í blálokin en skotið geigaði. Unglingaflokkur Snæfells og Skallagríms hefur staðið sig mjög vel í vetur og endaði til að mynda í öðru sæti eftir deildarkeppnina öllum að óvörum. Þetta var því sárt og naumt tap í undanúrslitunum.