Skessuhorn:

Langtímakröfur bæjarsjóðs hækka um 242 milljónir vegna OR

14. apríl 2011

Á fundi bæjarstjórnar Akraness sl. þriðjudag var kynnt endurskoðun á fjárhagsáætlun og breytingar á henni samkvæmt greinargerð Árna Múla Jónassonar bæjarstjóra. Stærsta breytingin á fjárhagsáætluninni tengist nýlegri lánafyrirgreiðslu bæjarins til Orkuveitu Reykjavíkur upp á 442 milljónir. Vegna þessa hækka langtímakröfur bæjarins um kr. 242,2 milljónir. Áður höfðu 200 milljónir verið lagðar til hliðar við fjárhagsáætlunargerð í lok ársins en sú upphæð var áætluð til að mæta tímabundnum aðgerðum vegna lífeyrisskuldbindinga, en fer nú í lánið til OR. Reyndar segir í greinargerð bæjarstjóra að allt eins hafi gerið gert ráð fyrir að verja þyrfti þessum peningum til lausnar á rekstrarvanda OR.

Minnihluti bæjarstjórnar, Gunnar Sigurðsson og Einar Brandsson bæjarfulltrúar Sjálfstæðisflokksins, lögðu fram bókun á bæjarstjórnarfundinum sl. þriðjudag, þar sem þeir ítrekuðu að þeir peningar sem áður höfðu verið áætlaðir til greiðslu lífeyrisskuldbindinga færi nú í lán til OR.

“Eftir að hafa fengið glöggar og greinargóðar skýringar á vanda OR styðja bæjarfulltrúar Sjálfstæðisflokksins á Akranesi tillögu um brýnar aðgerðir til lausnar á vanda fyrirtækisins. Sem betur fer er fjárhagsstaða Akraneskaupstaðar það sterk eftir góða fjármálastjórn sl. kjörtímabil að kaupstaðurinn átti þann 31.12.2010 alls 492 milljónir króna í handbæru fé. Sú staða gerir kaupstaðnum kleift að standa við sinn hluta lánveitingar til OR,” segir m.a. í bókun Gunnars og Einars.