Skessuhorn:

Gular og glaðar á konukvöldi ÍA

23. apríl 2011

Mikið fjör og góð aðsókn var á konukvöldi ÍA sem haldið var í íþróttahúsinu að Jaðarsbökkum fyrir skömmu. “Við erum fyrir löngu búin að sprengja alla samkomusali á Skaganum utan af okkur og alltaf er jafngóð aðsókn á þessa fjáröflun sem við í kvennafótboltanum erum búin að standa fyrir í 12-14 ár,” segir Jóhanna Leópoldsdóttir, einn aðalforsprakkinn fyrir konukvöldinu í samtali við Skessuhorn. Um 330 konur sóttu samkomuna og klæddust gulum lit, en þema kvöldsins var „gular og glaðar,“ eins og glögglega má sjá á meðfylgjandi mynd þar sem klæðst var gulu og dreypt á gulum veigum.

Á konukvöldinu er boðið upp á hátíðarmat, tískusýningu og ýmiss skemmtiatriði. ÍA á um þessar mundir mjög efnilegt unglingalið, 2. flokk kvenna, stelpur sem eru búnar að spila saman frá því þær voru níu ára gamlar. Stelpurnar þjónuðu til borðs á konukvöldinu og nutu einnig aðstoðar karlpenings sem að örðu leyti hafði sig ekki í frammi, enda kvöldið kvenþjóðarinnar.

Veislustjórar voru hinir þekktu útvarpsmenn Siggi Hlö og Valli sport og stóðu þeir fyrir samkvæmisleikjum sem voru meðal skemmtiatriða. Hápunkt kvöldsins sagði Jóhanna Leópoldsdóttir þó hafa verið söng stúlknanna á lagi eftir þjálfara sinn Elvar Grétarsson.