Skessuhorn:

Víðavangshlaup Íslands verður að þessu sinni haldið á Hvanneyri

25. apríl 2011

Víðavangshlaup Íslands 2011 verður hlaupið á Hvanneyri í Borgarfirði laugardaginn 7. maí nk. klukkan 11-14. Það verður í umsjón Ungmennasambands Borgarfjarðar. Hlaupið verður eftir túnvegum, malarstígum og reiðgötum í kringum Hvanneyrarstað. Hlaupið verður ræst frá aðalbyggingu Landbúnaðarháskólans þar sem búningsaðstaða verður einnig. Keppendur skulu mæta við Landbúnaðarháskólann a.m.k. 30 mín. áður en hlaup hefst í viðkomandi flokki til að fá afhent keppnisnúmer.

Skráning í hlaupið fer fram í mótaforriti FRÍ eins og venjulega, en vefslóðin þar er www.fri.is. Skráningarfrestur er til miðnættis fimmtudaginn 5. maí. Þeir sem ekki hafa aðgang að mótaforritinu geta sent skráningar á netfangið umsb@umsb.is og þarf að gefa upp fullt nafn keppenda og fæðingarár. Samkvæmt reglugerð FRÍ um Víðavangshlaup Íslands er keppnin öllum opin þó þeir séu ekki skráðir í sérstakt íþróttafélag eða lið. Þátttökugjald fyrir 17 ára og eldri er  1.500 krónur en 700 krónur fyrir 16 ára og yngri. Þátttökugjöld skal greiða áður en keppni hefst á laugardag með því að leggja inn á reikning Ungmennasambands Borgarfjarðar nr. 0354-26-59, kt. 670269-0869. Staðfesting sendist á umsb@umsb.is með skýringuna „VÍ-nafn þátttakanda“ eða komið með staðfestingu á greiðslu á keppnisstað. Hlaupsstjóri verður Guðmundur Sigurðsson. Nánari upplýsingar um keppnisflokka og annað sem viðkemur mótinu er að finna á www.fri.is