Klakabandið, danshljómsveit frá Ólafsvík, fagnar 30 ára starfsafmæli sínu á þessu ári. Hljómsveitin hefur starfað með hléum frá 1981, leikið á dansleikjum aðallega á heimaslóðum auk tímabila sem hljómsveitin gerði út á höfuðborgarsvæðinu og víðar um landið. Fjöldi liðsmanna sem komið hafa að starfi sveitarinnar er 19 auk nokkurra sem starfað hafa skemur á ýmsum tímum. Félagarnir hafa af þessu tilefni ákveðið að halda sérstakt afmælisball þar sem hinar ýmsu útgáfur bandsins gegnum tíðina stíga á stokk og leika vinsælustu lögin frá hinum ýmsu tímabilum áratugina þrjá. Nær allir liðsmenn í sögu hljómsveitarinnar munu spila á ballinu.
|
Undirbúningur afmælisballsins hefur staðið yfir um nokkurt skeið, efnisskrá valin og haldnar hafa verið nokkrar æfingar. Hljómsveitin hefur sett upp fésbókarsíðu, með nafni hljómsveitarinnar en þar má finna upplýsingar um tilurð og sögu hljómsveitarinnar. Síðuna prýða nokkrar gamlar ljósmyndir. Það má einnig finna flest lög sem hvað vinsælust hafa verið á dansleikjum hljómsveitarinnar, ennfremur er þar hljóðbrot með útgefnu lagi eins meðlimanna, Sigurðar Höskuldssonar, sem hefur gefið út tvo diska með eigin lögum. Liðsmenn hafa leikið í hinum ýmsu hljómsveitum gegnum tíðina, m.a. Sveinsstaðasextettinum, Krass, Lúkas, Nota Bene, Þúfnabönum, Upplyftingu, Sálinni, Saga Class, Dos Pilas, 1”6” og Ungmennafélaginu, svo einhverjar séu taldar.
Afmælisball Klakabandsins verður haldið laugardagskvöldið 28. maí í félagsheimilinu Klifi í Ólafsvík. Miðað við undirtektir búast Klakar við góðri aðsókn, m.a. ætla nokkrir árgangahópar að hittast og skella sér á ballið og rifja upp gamlar stundir.
|
