Skessuhorn:

Samtökin Skagaforeldrar með opinn fund í dag um virkni foreldra

5. maí 2011

Í janúar síðastliðnum voru á Akranesi stofnuð samtökin Skagaforeldrar. Að þeim standa foreldrar af öllum skólastigum og í stjórn eru fulltrúar frá öllum stjórnum leik,- grunn- og framhaldskóla í bæjarfélaginu. Markmið samtakanna er að efla foreldrastarf á Akranesi og stuðla að góðri samvinnu á milli heimilis og skóla. Að sögn Ólafar Lindu Ólafsdóttur stjórnarmanns í Skagaforeldum er margt búið að vera í gangi í þessum nýstofnuðu samtökum. Nefnir hún að samtökin eru komin með áheyrnarfulltrúa í Fjölskylduráði Akraneskaupstaðar og einnig er búið að stofna vinnuhóp fyrir ADHD greind börn. Þá er búið að opna heimasíðu og facebooksíðu, en nú er komið að fyrsta opna fræðslufundinum. Í dag, fimmtudaginn 5. maí klukkan 18 verður fyrirlestur í sal Grundaskóla á vegum samtakanna og í boði Norðuráls.

Fyrirlesarinn Guðrún Jónsdóttir kemur frá samtökunum Heimili og skóli. Hún mun fjalla um mikilvægi þessa að vera virkt foreldri og að hafa gott samstarf á milli heimilis og skóla, hvað foreldrastarfið er mikilvægt og hvað foreldrar geti gert. Rætt verður um foreldrastarf, bekkjastarf og skólamál almennt. Fyrirlesturinn verður í sal Grundaskóla og mun hefjast kl: 18.00 en fundurinn stendur til kl. 19.30.

„Vonumst við hjá samtökunum til þess að fá sem flesta foreldra, aðstandendur og þá sem vinna með börnum til að mæta á þennann fyrsta viðburð sem samtökin standa að. Ég bendi á heimasíðu samtakanna www.skagaforeldrar.is og hvet alla þá sem hafa eitthvað fram að færa að koma sér í samband við stjórnina. Verum virk í foreldrastarfi og látum okkur málin barna okkar varða,“ segir Ólöf Linda.