Skessuhorn:

Skipakomur skemmtiferðaskipa fleiri en undanfarin ár

17. maí 2011

Á hverju sumri kemur fjöldi skemmtiferðaskipa til Grundarfjarðar og að sögn Jónasar Víðis Guðmundssonar markaðsfulltrúa Grundarfjarðarbæjar verða skipakomur fleiri í sumar en undanfarin ár. “Alls verða 16 skipakomur í sumar en þess má þó geta að sama skipið kemur þrisvar sinnum í höfn og þá koma tvö önnur skip tvisvar,” segir Jónas Víðir.  Fyrsta skipið mun leggjast við höfn miðvikudaginn 29. júní og það síðasta kemur 2. september. Stærsta skipið sem kemur til Grundarfjarðar þetta árið er Ocean Princess en það er rúmlega 30 þúsund brúttótonn og mun liggja við ankeri miðvikudaginn 17. ágúst.

Síðastliðið sumar var nýtt móttökusvæði fyrir ferðamenn af skemmtiferðaskipum, ásamt nýrri flotbryggju, tekið í notkun í Grundarfjarðarhöfn. Þá hafa heimamenn yfirleitt staðið fyrir veglegri móttöku fyrir farþega skemmtiferðaskipanna. “Nú erum við einmitt að skipuleggja móttökurnar og eigum eftir að taka ákvörðun um með hvaða hætti þær verða. Við erum harðákveðin í að taka vel á móti farþegum og hafa móttökuhóparnir okkar ætíð vakið mikla lukku. Við erum allavega í sókn og þetta eykst ár frá ári. Nú þegar eru til dæmis bókaðar tólf skipakomur fyrir sumarið 2012 og þar mun bætast við,” sagði Jónas Víðir að lokum.