Skessuhorn:

Opnað fyrir skráningu á fyrsta landsmót UMFÍ 50+

23. maí 2011

Fyrir helgina var opnað fyrir skráningu á fyrsta Landsmót UMFÍ 50+ sem haldið verður á Hvammstanga 24.-26. júní í sumar.  Af þessu tilefni komu þeir Ágúst Þorsteinsson og Árni Einarsson við í Þjónustumiðstöð UMFÍ í Sigtúni í Reykjavík og skráðu sig til þátttöku í mótinu. Hlaupagarpurinn Ágúst Þorsteinsson frá Hömrum í Reykholtsdal hefur alla tíð keppt undir merkjum Umf. Íslendings sem er eitt af aðildarfélagum UMSB. Eitt af fyrstu stórmótum hans var þátttaka í Landsmóti UMFÍ á Akranesi 1975. Þar keppti hann í sundi. Lengstum var Ágúst í hópi þekktustu langhlaupara landsins. Hans keppnisferli lauk 1983 en þá keppti Ágúst á heimsmeistaramótinu sem þá var haldið í Helsinki. Í dag leikur hann golf sér til skemmtunar.

Árni Einarsson verður 80 ára í haust. Hann byrjaði að keppa 18 ára gamall en hans félag alla tíð hefur verið Ungmennafélag Selfoss.  Aðalgrein Árna lengstum var kringlukast. Árið 1957 hætti Árni að keppa en tók upp þráðinn að nýju fyrir þremur árum síðan, 77 ára að aldri. Hann hefur keppt á Evrópu- og Norðurlandamótum öldunga en frá því að hann fór að keppa að nýju 2008 hefur hann unnið til 56 verðlaunapeninga.

Keppnisgreinar á mótinu í sumar verða badminton, blak, boccia, bridds, fjallaskokk, frjálsar íþróttir, golf, hestaíþróttir, línudans, pútt, skák, starfsíþróttir, sund og þríþraut. Skráning og aðrar upplýsingar um mótið eru að finna á www.landsmotumfi50.is Þátttökugjald  er 6.000 kr. óháð greinafjölda. Innifalið í verðinu er keppni, tjaldsvæði og afþreying meðan á mótinu stendur.