Smáþjóðaleikarnir fóru fram í fjórtánda sinn í Liechtenstein í síðustu viku. Sundfélag Akraness átti að þessu sinni tvo sundmenn í íslenska landsliðinu, þau Ágúst Júlíusson og Ingu Elínu Cryer, en þau syntu bæði mjög vel á mótinu. Inga Elín vann til fjögurra verðlauna. Hún fékk gullverðlaun í 4x200m skriðsund boðsundi með þeim Eygló Ósk Gústafsdóttur, Bryndísi Rún Hansen og Ingibjörgu Kristínu Jónsdóttur. Inga fékk silfurverðlaun í 800m skriðsundi og brons í 400m fjórsundi og 400m skriðsundi. Einnig náði hún í úrslit í 200m flugsundi og endaði í 5.sæti þar.
|
Ágúst vann til þriggja verðlauna en þar á meðal var eitt gull í 4x100m fjórsund boðsundi, þar sem hann synti flugsundssprettinn, en með honum í sveitinni voru Davíð Hildiberg Aðalsteinsson, Jakob Jóhann Sveinsson og Árni Már Árnason. Þeir kappar voru mjög nálægt lands- og mótsmeti í þessari grein. Ágúst fékk þar að auki tvenn silfurverðlaun, í 100m flugsundi og 4x100m skriðsund boðsundi. Þá komst Ágúst í úrslit í 200m flugsundi og endaði í 6. sæti. Þess má geta að íslenska sundliðið vann til 43 verðlauna á þessum Smáþjóðaleikum en 58 verðlaun voru í pottinum svo þetta má teljast mjög góður árangur. Allt íslenska liðið vann samtals 68 verðlaun í ýmsum íþróttagreinum.
|
