Þessa dagana er sláttur er að fara af stað á bæjum víða um Vesturland en yfirleitt eru það slægjur sem fengu áburðargjöf snemma í vor. Auk slægja í Belgsholti í Melasveit er þar einnig kominn litur á kornakrana, en Belgsholt er eitt þeirra kornbýla þar sem sáð var fyrir repju, olíufræi, í vor. Haraldur Magnússon bóndi sagði í samtali við Skessuhorn að eitt afbrigðanna þriggja sem hann sáði fyrir repjunni væri að standa sig, það er galileo afbrigðið sem er í tveimur hekturum. Annað afbrigðið, sem kallast goja, drapst en það þriðja sem sáð var og lifir er í smáskika akursins. “Þetta er í fyrsta skipti sem ég sái hér í Belgsholti fyrir repju og veit því ekkert hverju má búast við, frekar en með uppskeruna yfirleitt þetta sumarið. Þetta er búið að vera skelfileg sprettutíð, bæði kalt og vætulaust alveg frá því í byrjun maí. Þótt við þurfum sjálfsagt ekki að kvarta hér á Vesturlandi miðað við önnur svæði á landinu,” segir Haraldur í Belgsholti.
|
