Skessuhorn:

Mótmæla skerðingu til heilbrigðisþjónustu á Akranesi

19. janúar 2012

Bæjarstjórn Akraness samþykkti ályktun á fundi sínum sl. þriðjudag þar sem mómælt er þeirri skerðingu á heilbrigðisþjónustu á Akranesi sem birtist í fjárlagafrumvarpi ríkisstjórnarinnar fyrir árið 2012. Í ályktuninni, sem Gunnar Sigurðsson fyrrv. forseti bæjarstjórnar lagði fram og allir bæjarfulltrúar undirrituðu, segir að í fjárlögunum séu framlög til Heilbrigðisstofnunar Vesturlands skorin það mikið niður að stjórnendur þar hafa neyðst til að grípa til þess úrræðis að leggja niður öldrunarlækningadeild sjúkrahússins á Akranesi. Við það tapist 14 legurými og hátt í 30 manns missa vinnuna, eingöngu konur.

Í ályktunni segir ennfremur að bæjarstjórn Akraness krefjist þess að ríkisvaldið tryggi rekstur HVE þannig að á Akranesi verði unnt að halda fullri heilsugæsluþjónustu og bráðaþjónustu, þar með talið skurðstofum, þannig að tryggt sé að m.a. fæðingadeild og slysamóttaka haldist óbreytt. Bent skal á að sjúkrahúsið á Akranesi er utan skilgreindra hamfarasvæða og þjónar því sem varasjúkrahús höfuðborgarsvæðisins ef til stórkostlegra náttúruhamfara kæmi.

Ennfremur krefst bæjarstjórn Akraness þess að ríkisvaldið tryggi að unnt verði að halda úti öldrunarþjónustu á Akranesi, bæði sjúkraþjónustu og endurhæfingu, sambærilegri og á sér stað fyrir lokun öldrunarlækningadeildarinnar á sjúkrahúsinu. Þessi þjónusta verði þá veitt í tengslum við HVE og Höfða, hjúkrunar- og dvalarheimili aldraðra á Akranesi.