Snæfellskonur virðast hafa eitthvert tak á Íslandsmeisturum Keflavíkur í körfubolta, en þær sigruðu þá öðru sinni í vetur í IE-deildinni þegar liðin mættust í Hólminum í gærkveldi. Lokatölur urðu 91:83 og þar með náðu Snæfellskonur sér á strik að nýju eftir tapleiki í tveimur síðustu umferðum deildarinnar. Snæfellskonur byrjuðu mjög vel, skoruðu tíu fyrstu stigin í leiknum og staðan var 29:18 fyrir Snæfell eftir fyrsta leikhluta. Snæfell hélt áfram að auka forystuna framan af öðrum leikhluta, en þá komust gestirnir í gang og munurinn var einungis sjö stig á liðunum í hálfleik 45:38 fyrir Snæfell. Jordan Murphree í Snæfelli er farið að líka parketið í Hólminum og hún var komin með 17 stig í hálfleik en næst henni var Alda Leif með 10 stig og 5 fráköst.
|
Baráttan hélt áfram í byrjun seinni hálfleiks og eftir þriðja leikhluta munaði fjórum stigum á liðunum, en Snæfell enn yfir 63:59. Kaflaskipti urðu í leiknum þegar Snæfell náði að rífa sig frá Keflavík í stöðunni 68:64, með tveimur þristum frá Jordan og Helgu Hjördísi, í stöðuna 75:66 og Keflavíkavíkurstúlkur voru farnar að gefa eftir í pressuvörninni. Þessi munur hélst nokkuð út leikinn en undir lokin voru mörg stig skoruð af vítalínunni. Lokatölur eins og áður segir 91:83.
Hjá Snæfelli var Jordan Murphree atkvæðamest með 31 stig, 6 fráköst, 3 stoðsendingar og 10 stolna bolta, Alda Leif Jónsdóttir skoraði 17 stig og tók 9 fráköst, Kieraah Marlow 16 stig, 10 fráköst og 7 stoðsendingar, Helga Hjördís Björgvinsdóttir 10 stig og 6 fráköst, Hildur Sigurðardóttir 9 stig, 9 fráköst og 7 stoðsendingar og Hildur Björg Kjartansdóttir 8 stig og 4 fráköst. Hjá Keflavík var Pálína Gunnlaugsdóttir langatkvæðamest með 33 stig.
Næsti leikur Snæfellskvenna í IE-deildinni verður nk. miðvikudagskvöld gegn Fjölni í Grafarvogi. Undanúrslitaleik Snæfells og Stjörnunnar í Poweradebikarnum, sem fram átti að fara í Hólminum nk. sunnudagskvöld, hefur verið frestað vegna kærumála sem tengjast hinum undanúrslitaleiknum í keppninni.
|
