Skessuhorn:

Héraðsbókasafni Borgarfjarðar gefnar bækur

3. febrúar 2012

Á dögunum var Héraðsbókasafni Borgarfjarðar í Borgarnesi færð bókagjöf. Bækurnar eru úr safni Guðmundar Hjartarsonar fyrrverandi seðlabankastjóra sem lést árið 2007. Ánafnaði Guðmundur safninu myndarlegt safn rita sem ættingjar hans höfðu milligöngu um að færa því fyrir nokkru. Gjöfin er talsverður styrkur fyrir héraðsbókasafnið og þar er að finna margt góðra bóka eins og segir í fréttatilkynningu á heimasíðu safnsins.

Guðmundur Hjartarson fæddist 1. nóvember 1914 á Litla-Fjalli í Borgarhreppi en fluttist til Reykjavíkur 25 ára gamall þar sem hann bjó æ síðan. Þar gegndi hann ýmsum störfum og embættum. Hann vann meðal annars í mörg ár hjá Sósíalistaflokknum, sat í bankaráði Búnaðarbankans og var svo að lokum seðlabankastjóri í 10 ár frá 1974-1984. Mun Guðmundur alltaf hafa haldið sambandi við Borgarfjörðinn og átt sterkar taugar þangað. Því má segja að bækur Guðmundar hafi fundið sér góðan samastað.