Skessuhorn:

Karlakór Bólstaðarhliðarhrepps með tónleika á Akranesi um helgina

7. mars 2012

Helgina 9.-10. mars nk. mun Karlakór Bólstaðarhlíðarhrepps leggja land undir fót og flytja fólki sunnan heiða söng- og  leikverkefnið  “Ég hef lifað mér til gamans.”  Dagskráin  byggist á lífshlaupi Björns Pálssonar, stórbónda og alþingismanns á Ytri Löngumýri, en Björn var litríkur persónuleiki og þjóðsagnapersóna í lifanda lífi. Textahöfundur  er Jóhanna  Halldórsdóttir á Brandsstöðum í Blöndudal. Í för með kórnum verður hljómsveit Skarphéðins H. Einarssonar og valinkunnir lesarar sem kynna Björn og segja af honum ýmsar sögur.  Þar kemur margt forvitnilegt fram  því á langri æfi  glímdi Björn  við lögspekinga, póiitíkusa og náttúruöflin og hafði jafnan sigur. Gamansemi og stríðni Björns var landsfræg og  verður þeim eðlisþáttum hans gerð góð skil í dagskránni.

Söng- og leikverkefnið  verður flutt í Tónbergi á Akranesi föstudagskvöldið 9. mars kl. 20.30, í Langholtskirkju í Reykjavík laugardaginn 10. mars kl. 14.00 og Félagsheimilinu á Flúðum í Hrunamannahreppi sama dag kl. 20.30.

-fréttatilkynning