Skessuhorn:

Gert ráð fyrir útskotum fyrir ferðafólk í nýrri vegagerð

13. mars 2012

Nýverið auglýsti Vegagerðin útboð á ný- og endurlögn Vestfjarðavegar af Eiði við Vattarfjörð og vestur fyrir Þverá á Kjálkafirði, alls um 16 kílómetra leið. Í útboðsgögnum sem birt voru í 3. tölublaði Framkvæmdafrétta Vegagerðarinnar kemur einnig fram að við veginn skuli verða áningarstaðir á tveimur stöðum. Segja má að hér sé um ánægjulega viðbót að ræða í nýframkvæmdum hjá Vegagerðinni þar sem alltof lítið er um staði við þjóðvegi landsins þar sem fólk getur stoppað, teygt úr sér á skjólgóðum stað og notið útsýnisins. Gert er ráð fyrir tíu bílastæðum og tveimur rútustæðum, bekkjum og ágætri aðstöðu. Í raun er eina sem vantar í  verklýsingu að sett verði upp salernisaðstaða. Þrátt fyrir það er ástæða til að fagna þessari viðbót við stærri verk í vegagerð.