Tæki og búnaður úr þrotabúi bjórverksmiðju Mjaðar í Stykkishólmi er á leið vestur á Ísafjörð, ef marka má frétt Bæjarins besta. Bjór hefur ekki verið framleiddur í Stykkishólmi síðan í júní 2011. Í frétt BB segir að unnið hafi verið að því að undanförnu að setja á stofn litla bjórverksmiðju á Ísafirði sem framleiða muni bjór til sölu í veitingahúsum og krám á svæðinu sem og í áfengisverslun, eins og þekkist víða erlendis. „Nú þegar liggur fyrir að einn frumkvöðlanna í hópnum hefur fengið samþykkt kauptilboð í tækjabúnað sem var í bjórverksmiðju á Snæfellsnesi,“ segir í frétt á www.bb.is. Eins og kunnugt er hefur einungis ein bjórverksmiðja verið á Snæfellsnesi og því eru líkur á að þekking og reynsla í greininni tapist þar með af svæðinu. Það er Atvinnuþróunarfélag Vestfjarða sem starfar með hópi áhugamanna á Vestfjörðum um verkefnið en leitar að fleiri áhugasömum aðilum til að taka þátt í stofnun ísfirskrar bjórverksmiðju.
|
