Skessuhorn:

Aðildarviðræður Íslands við ESB - Hver er staðan í viðræðunum í dag?

3. apríl 2012

Strax í kjölfar alþingiskosninganna vorið 2009 ákvað núverandi ríkisstjórn Samfylkingar og Vinstri Grænna að setja aðild að Evrópusambandinu á dagskrá íslenskra stjórnmála. Þremur árum síðar hefur megin undirbúningsvinnu viðræðna verið lokið og hafa samningaviðræður nú náð fullu skriði. Skipulag viðræðna er þannig að samið er á grundvelli 35 málaflokka eða samningskafla sem ræddir eru hver í sínu lagi. Fyrir hönd Íslands er sérstök samninganefnd sem skipuð var af utanríkisráðherra. Formaður hennar er Stefán Haukur Jóhannesson sem jafnframt skipar stöðu aðalsamningamanns Íslands. Auk hans sitja í nefndinni 17 einstaklingar sem hafa til að bera sérfræðiþekkingu og reynslu af hinum 35 málaflokkum.  Á vegum ESB semur sérstök nefnd fastafulltrúa aðildarríkjanna 27 sem leidd er af fulltrúa þess ríkis sem fer með formennsku í ráðherraráðinu hverju sinni.

Lesa má fréttaskýringu um stöðu aðildarviðræðna Íslands og Evrópusambandsins, afstöðu þingflokka og fleira í Skessuhorni sem kom út í dag. Fréttaskýring þessi er unnin í kjölfar heimsóknar blaðamanns Skessuhorns til Brussel í síðustu viku.