 Brotist var inn á skrifstofu Golfklúbbsins Leynis á Garðavelli á Akranesi sl. nótt og stolið þaðan splunkunýjum tölvubúnaði sem unnið var hörðum höndum við að koma fyrir á skrifstofunni í gær. Þetta er í annað skiptið á rúmum mánuði sem brotist er inn hjá Leyni og er málið til rannsóknar hjá lögreglunni á Akranesi. Fólk sem hugsanlega hefur veitt athygli grunsamlegum mannaferðum við golfskálann eftir klukkan 11 í gærkveldi er beðið að hafa samband við lögreglu eða Gylfa Sigurðsson framkvæmdastjóra Leynis. Gylfi sagði í samtali við Skessuhorn að þetta væri ekki góð byrjun á golftímabilinu, en búið var að koma fyrir í tölvunum öllum gögnum varðandi komandi tímabil. Gylfi segir að rótað hafi verið í skúffum en engu stolið öðru en tölvubúnaðinum. Þegar brotist var inn fyrir rúmum mánuði var engu stolið, en unnar lítilsháttar skemmdir.
|
