Þrjú svæði í Borgarbyggð eru talin áhugaverð að skoða með tilliti til beislun vindorku; svæðið neðan til á Mýrum, með farvegi Hvítár og ofan Borgarness, og ofantil í Norðurárdal, upp undir Holtavörðuheiði. Þetta kemur fram í nýútkominni skýrslu vinnuhóps um nýtingu vindorku í Borgarbyggð sem var kynnt á fundi Borgarfjarðarstofu fyrr í mánuðinum. Hins vegar telur hópurinn rekstur stórra vindorkuvera ekki vera vænlegan kost á svæðinu eins og staðan er í dag, en ýmsir möguleikar séu á rekstri minni vindorkuvera. Að sögn Jónínu Ernu Arnardóttur, formanns stjórnar Borgarfjarðarstofu, mun sveitarfélagið halda áfram að fylgjast með þessum málum á hliðarlínunni en í dag sé beislun vindorku ekki hagkvæmur kostur í Borgarbyggð. „Rafmagnsverð hefur verið að hækka á svæðum sem eru ekki með hitaveitu og á þessum köldu svæðum, þar sem íbúar geta tengst neti Landsvirkjunar, gæti vindorkan verið áhugaverður möguleiki,“ sagði Jónína Erna í samtali við Skessuhorn.
Nánar er rætt við Jónínu Ernu og fjallað um nýútkomna skýrslu vinnuhóps um beislun vindorku í Borgarbyggð í Skessuhorni vikunnar sem kemur út á morgun.
|
