Oft berast inn á ritstjórn Skessuhorns uppástungur um fólk sem lesendur vilja gjarna sjá samtöl við í blaðinu. Þannig var með Oddnýju Þorkelsdóttur í Borgarnesi, konu á 92. aldursári sem um tíðina hefur sett svip sinn á bæjarlífið, m.a. við píanóundirleik allt frá unglingsaldri, með kórum, kvartettum og einsöngvurum, auk orgelsleiks við messusöng í kirkjum víða um Vesturland. Hún var um tíma organisti bæði í Borgarneskirkju og Stafholti. Þegar blaðamaður Skessuhorns hafði samband við Oddnýju kvaðst hún svo sem ekki hafa frá miklu að segja en hann gæti svo sem alveg kíkt í kaffi. Annað kom á daginn, Oddný hafði frá ýmsu skemmtilegu að segja og endaði hún spjall sitt við blaðamann með því að setjast við píanóið og spila „Til eru fræ,” þannig að Haukur Morthens hefði verið vel sáttur með. Og ekki nóg með það, ekki kom til greina að gesturinn færi án þess að drekka kaffi og fá þessa fínu karamellutertu með. Geri betur með slíkan viðurgerning fólk sem komið er á tíræðisaldur.
Oddný Þorkelsdóttir í Borgarnesi rifjar upp gamlar minningar í Skessuhorni vikunnar.
|
