Skessuhorn: |
Heitt vatn fundið á Hvammi í Skorradal |
Afturhaldsbröltinu lokið |
segir Haukur Engilbertsson á Vatnsenda |
23. febrúar 2000 |
| Bormenn í Skorradal komu niður á heitt vatn í landi Eflingar í Hvammi aðfararnótt mánudags. Að sögn verkstjórans á staðnum var vatnið um 60 gráðu heitt á þessu dýpi en hitastigið fer hækkandi eftir því sem neðar dregur. Á mánudag var borinn kominn á um 400 metra dýpi og var ætlunin að bora eitthvað lengra áður en holan yrði rannsökuð. |
| Eins og komið hefur fram í Skessuhorni hafa boranirnar sem eru á vegum stéttarfélagsins Eflingar vakið hörð viðbrögð hreppsnefndar í Skorradal sem telur að hreppurinn eigi rannsóknarvinnu sem lagt var í fyrir nokkrum árum á þessum stað. Þá óttast hreppsnefnd að borhola sveitarfélagsins sé í uppnámi vegna þessara framkvæmda. Ekki eru þó allir íbúar sveitarfélagsins ósáttir við framkvæmdir Eflingar. Eigendur jarðanna Dagverðarness og Vatnsenda sem liggja að Hvammi hafa fagnað þessum borunum. Þessir aðilar hafa ekki viljað nýta sér vatn úr borholu hreppsins en á báðum jörðunum eru þéttar sumarhúsabyggðir. Haukur Engilbertsson bóndi á Vatnsenda sagði í samtali við Skessuhorn að vel kæmi til greina af sinni hálfu að nýta vatn frá borholunni í Hvammi. “Ég fagna því að afturhaldsbrölti hreppsnefndarinnar skuli nú lokið og vona að þetta verði til þess að það verði aftur búandi hér í sveitarfélaginu,” sagði Haukur. |
|
| GE |
| |
 |
| |
|
|
