Skessuhorn: |
|
Mesta mildi að ekki varð manntjón |
Aurskriður splundra sumarhúsum við Hreðavatn |
29. mars 2000 |
| Tveir sumarbústaðir í Saurdal við Hreðavatn gjöreyðilögðust aðfararnótt sl. þriðjudags þegar tvær aurskriður féllu á þá úr kjarrivaxinni hlíð skammt fyrir ofan. Skriðurnar voru 10-15 metra breiðar og farvegir hvorrar um sig 70-80 metra langir. Annað húsanna færðist töluvert úr stað, splundraðist og staðnæmdist skammt frá þriðja húsinu sem stendur á milli þeirra sem skemmdust, en þar var einmitt kona í fastasvefni. Húsin sem urðu fyrir skriðunum voru mannlaus þannig að engan sakaði við þessar hamfarir. |
Það verður að teljast mesta mildi að ekki fór verr, því jarðvegur fyrir ofan hús konunnar færðist um nokkrar tommur, án þess þó að fara niður brekkuna.
Undanfarin ár hafa nemendur Samvinnuháskólans á Bifröst leigt nokkur af þeim húsum sem í Saurdal eru. Þannig má segja að hröð uppbygging nemendagarðanna á Bifröst hafi dregið úr þörf á nýtingu þessara sumarhúsa sem í Saurdal eru, og þakka menn það í dag. |
|
| MM |
| |
 |
| |
|
|
