Í Snæfellsbæjarfréttum er greint frá helstu hræringum í atvinnulífinu:
Ný verslun hefur verið opnuð að Ólafsbraut 19, er það Tækja og tölvubúðin, sem hjónin Þröstur Kristófersson og Sigurbjörg Þráinsdóttir reka, ásamt börnum sínum. Þar eru til sölu m.a. tölvur, símar og allt sem viðkemur skrifstofu.
Eigendaskipti hafa orðið á Grillskálanum, sem nú heitir Prinsinn. Nýir eigendur koma frá Grundarfirði.
Þann 10. feb.s.l. opnaði Guðmunda Wium verslun í kjallaranum hjá sér, hefur hún til sölu m.a. frumbyggjavöru,búsáhöld og handunnin kerti.
Starfsemi er komin í fullan gang í enduruppbyggingunni hjá Ísverksmiðju Breiðafjarðar ehf. eftir brunann sem varð í janúar. Að sögn Bjarna Einarssonar eiganda Breiða ehf. stefnir hann að því að verkssmiðjan komist í gang í mars n.k. full afköst verksmiðjunnar verða um 60 tonn á sólarhring.
Eins og fram hefur komið á Skessuhornsvefnum standa miklar framkvæmdir yfir í Rifshöfn. Miklar framkvæmdir eru einni áætlaðar í Arnarstapahöfn. Þar sem Arnarstapahöfn er eina virka höfnin á sunnanverðu Snæfellsnesi eru mikils vænst af þessum framkvæmdum. Smábátaútgerðin verður betur sett svo og vaxandi fjöldi ferðamanna sem fer með skoðunarbátnum Nökkva til að sjá hina stórbrotnu stuðlabergsströnd, renna fyrir fisk á sjóstöng og fara í hvalaskoðun.
Þegar er búið að veita fé til framkvæmdanna bæði af ríki og bæ svo nú er beðið eftir tilskyldum leyfum og samþykktum á mannvirkjum til að framkvæmdir geti hafist. |
