Borgarfjarðarsveit varð til við sameiningu Reykholtsdalshrepps, Lundarreykjadalshrepps, Andakílshrepps og Hálsasveitar árið 1998. Hvítársíðuhreppur og Skorradalshreppur höfnuðu þátttöku í þeirri sameiningu. Aðspurður um hvort forsendur væru breyttar nú, sagði Davíð Pétursson, oddviti Skorradalshrepps, að það skaðaði allavega ekki að tala saman. Hann sagði erindi Borgarfjarðarsveitar hinsvegar ekki komið inn á borð hjá sér en reiknaði með að það yrði tekið fyrir á næsta fundi hreppsnefndar sem verður um miðjan apríl n.k. „Ég sé hinsvegar ekki ástæðu til að skoða sameiningu fyrr en í lok kjörtímabils. Ég hef ekki orðið var við neitt sem gefur ástæðu til að flýta því,“ segir Davíð. „Mér finnst sjálfsagt að fara yfir sviðið og skoða stöðuna, meta kosti og galla,“ segir Helga Halldórsdóttir forseti bæjarstjórnar Borgarbyggðar. „Þegar menn sjá niðurstöðuna út úr slíkri könnun þá taka menn skrefið. Ég lít á þetta sem könnunarviðræður og nauðsynlegt að skoða það með opnum huga. Við eigum hinsvegar eftir að fjalla um þetta erindi en ég geri ráð fyrir að við tökum jákvætt í það,“ segir Helga. |