Skessuhorn:

Framreiknað aflaverðmæti 6,5 milljarður króna

4. janúar 2005

Skessuhorn greindi frá því í haust að til stæði að leggja hinu gamla happafleyi, Haraldi Böðvarssyni AK 12. Skömmu fyrir jól kom skipið síðan úr sinni síðustu veiðiferð og verður því nú lagt og úthaldi þess hætt. Skipið var smíðað í Kristiansund í Noregi og kom til Akraness í júlí 1975 og hefur því verið í þjónustu HB í tæp 30 ár.  Skipinu hefur ávallt verið vel við haldið en engu að síður er nú komið að ýmsum stórum viðhaldsverkefnum sem ekki verður ráðist í.

Á heimasíðu HB Granda segir m.a.: “Skipið hefur verið hið mesta happafley og gott sjóskip. Haraldur Böðvarsson AK 12 hefur fært mikinn afla á land undir stjórn þriggja skipstjóra og nemur aflinn alls 117.784 tonnum af bolfiski og framreiknað aflaverðmæti skipsins á þessum tíma er rúmir 6,5 milljarðar króna. Kristján Pétursson var skipstjóri á skipinu frá 1975, Gunnar Einarsson frá 1986 og Viðar Gunnarsson frá 1992. Skipstjóri í síðustu veiðiferðinni var Árni Einarsson, 1. stýrimaður og yfirvélstjóri var Örn Helgason.”