Skessuhorn:

Badmintonfélag Akraness verður 30 ára

1. mars 2006

Í tilefni af 30 ára afmæli Badmintonfélags Akraness verður haldið Íslandsmót unglinga í badminton á Akranesi dagana 3. til 5 mars nk. Á mótinu, sem haldið verður í íþróttahúsinu við Vesturgötu, verða um 250 keppendur frá öllu landinu á aldrinum 9 til 19 ára en þetta er í fyrsta sinn sem ungmenni undir 11 ára aldri fá að taka þátt í þessu móti. Þá verða um 70 keppendur frá Badmintonfélagi Akraness.

Félagið var formlega stofnað í nóvember 1976 en íþróttin hefur verið stunduð frá því að íþróttahúsið við Laugarbraut var tekið í notkun árið 1946. Síðan þá hefur badminton á Akranesi eflst og dafnað og fjölmargir Íslandsmeistaratitlar unnist í gegnum tíðina.

Laufey Sigurðardóttir, formaður félagsins segir 10 ár síðan félagið stóð fyrir Íslandsmóti unglinga eða á 20. afmælisári þess og því hefði verið tilvalið að fá að halda keppnina aftur núna. “Þetta verður mjög gaman, um 500 leikir verða spilaðir um helgina og því er von á miklu fjöri. Félagið er að gefa út afmælisrit sem verður dreift út til allra á Akranesi á næstu dögum og þar verður að finna ýmsar fréttir og gögn um félagið, viðtal við þjálfarann okkar, Dipu Gosh og margt fleira. Svo verður haldin formleg afmælishátíð í nóvember á þessu ári með pompi og pragt,” segir Laufey.

Badmintonfélag ÍA geymir nokkra bestu og efnilegustu badmintonspilara landsins og þess má geta að fjórir landsliðsmenn í unglingalandsliði 17 ára og yngri og tveir í U19 eru í röðum félagsins og því er óhætt að segja að hér sé efnilegt íþróttafólk á ferð.