Skessuhorn:

Nýburar í Grundarfirði fá sængurgjöf samfélagsins

1. mars 2006

Bæjarráð Grundarfjarðar hefur samþykkt einróma tillögu Bjargar Ágústsdóttur bæjarstjóra um að sveitarfélagið færi nýfæddum Grundfirðingum gjöf. Björg segir tillöguna sprottna úr umræðum sem fram fóru á opnum fundi í bænum um fjölskyldustefnu fyrir nokkru. Í tillögunni er gert ráð fyrir að sveitarfélagið færi nýfæddum bæjarbúum 15-20 þúsund krónur og að árlegur kostnaður við þetta framtak verði á milli 150-200 þúsund krónur. „Með samþykkt tillögunnar er bæjarráð að undirstrika það fjölskylduvæna samfélag sem hér er því þegar öllu er á botninn hvolft eru allir íbúar hér hluti stórfjölskyldu Grundarfjarðar.

Í umræðum um tillöguna á fundi bæjarstjórnar var rædd sú hugmynd að fá fleiri aðila að málinu og gera gjöfina því stærri. Aðspurð hvort samþykkt tillögunnar beri vott um örvæntingu segir Björg svo alls ekki vera. Með gjöfinni sé ekki verið að skapa gulrót til frekari barneigna heldur sé með henni verið að færa nýfæddum Grundfirðingum nokkurs konar sængurgjöf samfélagsins og um leið eru þeir boðnir velkomnir í barnvænan bæ.

Eftir því sem næst verður komist hafa tveir Grundfirðingar fæðst á þessu ári.