Skessuhorn:

Rás 2 rokkar hringinn - Verður á Akranesi 16. mars

8. mars 2006

AMPOP, Dikta og Hermigervill á tónleikaferð um landið!

Rás 2 mun leiða tónleikaferðalag um Ísland núna í marsmánuði. Heimsóttir verða 6 staðir á landsbyggðinni og endað í Reykjavík með beinni útsendingu á Rás 2. Þetta er í fyrsta skipti sem Rás 2 stendur fyrir tónleikaferð um landið, en áður hefur Rásin (sem er, samkvæmt nýjustu könnun Gallups, vinsælasta útvarpsstöð landsins) aðstoðað listamenn á borð við Jón Ólafsson, Jagúar, Bubba Morthens, Hörð Torfason og núna síðast Sign, við að rokka hringinn og bera fagnaðarerindið út um allt land.

Tónleikadagskráin lítur svona út:

10. mars Menntaskólinn á Egilsstöðum (ásamt hljómsveitinni Miri),
11. mars Græni Hatturinn, Akureyri (ásamt Hvanndalsbræðrum),
12. mars Menntaskólinn á Ísafirði (ásamt Húsinu á sléttunni),
14. mars Fjölbrautaskóli Suðurlands á Selfossi (ásamt hljómsveitinni Motýl),
15. mars Ráin, Reykjanesbæ (ásamt hljómsveitinni Koju)
16. mars Bíóhöllin, Akranesi (ásamt hljómsveitinni Planc)
17. mars Nasa, Reykjavík (ásamt hljómsveitinni Vax)

Nánari upplýsingar um tónleikadagskrána á ruv.is/poppland

Hljómsveitin AMPOP, sem hlaut bæði Íslensku tónlistarverðlaunin og  hlustendaverðlaun XFM á dögunum fyrir besta lag ársins 2005, ,,My Delusions", mun fara fyrir hópnum en samnefnd plata sveitarinnar er ein vinsælasta platan á Íslandi um þessar mundir og lög AMPOPs hljóma reglulega á allflestum útvarpsstöðvum landsins.

    
Hljómsveitin Dikta mun einnig stíga á stokk en plata sveitarinnar ,,Hunting for Happiness" frá því í fyrra hefur hlotið einróma lof gagnrýnenda og lagið ,,Breaking The Waves" er eitt af vinsælustu lögunum á Íslandi í dag.

Þriðji flytjandinn í tónleikaferð Rásar 2 um landið er Hermigervill en hann hefur vakið mikla athygli fyrir magnaða tónleika undanfarna mánuði. Auk þess mun Rás 2 bjóða einni efnilegri hljómsveit frá hverju sveitarfélagi sem heimsótt
verður að stíga á stokk og opna tónleikana í sínum heimabæ. Þetta er fyrsta tónleikaferð aðal-flytjendanna þriggja um landið en allir eiga þeir það sameiginlegt að hafa hlotið mikið lof fyrir tónleika sína.

Nánari upplýsingar veita:

Ólafur Páll Gunnarsson

verkefnisstjóri tónlistar á Rás 2

515-3000

olafurpg@ruv.is

Ásgeir Eyþórsson

framkvæmdastjóri ferðarinnar
696-9406
asgeir.eythorsson@internet.is