Skessuhorn:

Forsvarsmenn skipafélaganna tregir til flutnings úr Sundahöfn

15. mars 2006

Að undanförnu hefur talsverð umræða farið fram um möguleika Grundartangahafnar í framtíðaruppbyggingu Faxaflóahafna sf. Telja margir að í framtíðinni muni hún taka að nokkru við hlutverki Sundahafnar sem helsta inn- og útflutningshöfn svæðisins. Á ráðstefnu sem haldin var í síðustu viku um framtíð Faxaflóahafna tóku forsvarsmenn stóru skipafélaganna tveggja þátt í umræðum og einnig var viðtal við þá í blaði sem gefið var út í tengslum við ráðstefnuna.

Ásbjörn Gíslason, forstjóri Samskipa segir í viðtali við blaðið: „Hvað Samskip varðar sé ég fyrir mér að inn- og útflutningur okkar fari áfram um Vogabakka nema sértækur flutningur í tengslum við uppbyggingu álvera eða svæðisbundinn flutningur því tengdur, svipað og gerist á Austfjörðum. Ég sé það því ekki gerast að hluti af starfsemi okkar, innflutningur og fiskflutningar, flytjist til dæmis upp á Grundartanga. Vörumiðstöðin og frystigeymslan hér gegna mjög mikilvægu hlutverki í söfnunarferli Samskipa og það gengur ekki upp að slíta reksturinn þannig í sundur.“

Í erindi á ráðstefnunni sagði Guðmundur Nikulásson, framkvæmdastjóri hjá Eimskip að unnið væri að 25 ára þróunaráætlun á Sundahafnarsvæðinu og félagið vildi nýta sér aðstöðuna þar „á arðsaman hátt eins lengi og við getum. Stefna Eimskips er að viðhalda Sundahöfn sem lykilhöfn í áætlunarsiglingum félagsins um ókomna framtíð.“ Vísa forystumenn skipafélaganna til þess að á Sundahafnarsvæðinu hafi á undanförnum áratugum verið fjárfest fyrir milljarðatugi og því ekki sjáfgefið að sú fjárfesting verði yfirgefin.

Þróunin er hinsvegar hröð og kannski hraðari en bæði forsvarsmenn sveitarfélaganna og skipafélaganna sjá fyrir um. Á endanum snýst málið að sjálfsögðu um hagkvæmni og fjármuni. Baldur Guðnason forstjóri Eimskips segir nefnilega orðrétt í viðtali við blaðið: „Til langs tíma má skoða það að starfsemin færist upp á Grundartanga að gefnum ákveðnum skilyrðum sem varða kostnað á tiltekna þjónustuþætti okkar, nýtingu þeirra fjárfestinga sem lagt hefur verið í Sundahöfn og síðan auðvitað það að samgöngumál verði komin í ákveðinn farveg, m.a. með lagningu Sundabrautar.“